ميزان الحياة
قاعدين في
المستشفى
مستنيين الدور
وهو لابس
النضارة
ومفكر حاله
واد جامد
قالها انا هقوم
خلي بالك ها
ردت عليه بدلال
ما تقوم ولا تغور
قام الواد قايم
بس نسي
حاجة مهمة
ان الكراسي دي
تلاتة في بعض
سندال يعني
يا عم الحج
انت الميزان
اول ما شال
جسمه
الكرسي طار
والست طارت
والشنطة طارت
والروج
والبودرة
والمراية
كله اترمى
على الارض
وهي بقت عاملة
زي السوبر مان
ايديها فوق
ورجليها تحت
وتصوت يا نهار
اسود
وهو ولا هنا
ماشي ويقول
بكل بجاحة
انا غلطان
طب غلطان
في ايه يا اخويا
في الفيزيا
ولا في الاصول
يا ولدي
اللي يسند حد
يا يكمل للاخر
يا ما يقومش
خالص
عشان في ناس
لو قمت من
جنبها
بتقع هي
والكرسي
والشنطة
والكرامة كمان
ومن يوميها
الست حرمت
بقت تقعد
في النص
عشان لو
حد قام
التاني يمسكها
... عمر عطاالله...
