وطننا العربي .. !!
يا حضرة جناب ..
وطننا العربي
اللي كان .. مهاب
ياللي فارد شنباتك
م المحيط.. للخليج
وبايع شرفاتك
ف سوق النخاسة
لأنجس نجاسة
وعايش .. تايه
في ارضك .. غريب
وسايب كلاب الصهاينة
بتنهش ف لحمك
وتاكل ف عضمك
ف عرضك ... وأرضك
وطولك .. وعرضك
وسايب حميرك
بتنهق .. لغيرك
وأمرك عجيب .. !!
يا حضرة جناب ..
وطننا العربي ..
اللي كان .. مهاب
فين كرامتك .. ؟!
وعظمة فخامتك
و " امنا العذرا "
وراياتك الخضرا
اللي كانت بترفرف
على ضي شهامتك
وورد ابتسامتك
راح فين .. يا حبيب .. !!
يا حضرة جناب ..
وطننا العربي ..
اللي كان .. مهاب
ليه ترضي تعيش .. ؟!
ع جناح التهميش
منتوف الريش
وتاكل حشيش
بتوب الذل
ونار الغل
يا مسكين ..؟!
وتجري تبوس ....
اقدام الهكسوس
وتنام عريان
ذليل .. ف الطين
عدمان .. وحزين
قلبك مليان ..
بكاء .. ونحيب .. !!
يا حضرة جناب ..
وطننا العربي ..
اللي كان .. مهاب
فاكر ... رماااان
يا سوبر ماااان
وانت ماشي ولابس ..
عباية العروبة الستان
وتاج الأبهة والسلطان
والعالم حواليك ..
شوية .. صعاليك
في وضع مريب .. !!
يا حضرة جناب ..
وطننا العربي ..
اللي كان .. مهاب
قوم اغسل عارك
حرر قرارك .. ودارك
عرضك وأرضك
بطولك وعرضك
واقتل شبح خوفك
جوا قلبك وجوفك
وخللي ضميرك نصيرك
وعليك ... رقيب .. !!
الشاعر / منصور ابوقورة