نشرب لبحر
إلى طوال لعمر
وتبورد في حومتنا لفجر
خليني نكر
بلا ما تعلمي فيا لحسانة
وتخلي ذياب البر بلا أمان
يزور الوقت باش تفرفر في جيوبهم المكانة
ديري واهيا الزاهية بلا زهو للبغو
حسانة ووصلي جبح النحلة والشهدة لفم الزهر..
راه كلب بنادم قصاح بلا قدر
.........................................................
نبغيك ...نبغيك
على مزاجي...على كانتي وقياس حياتي
وبلا ويفي يا وليفي
بلا زواق نبغيك كيف أنتِ راحة الروح
نبغيك بلا مطلية بلا عكر
وإلى حَنّيتي وعمتي في حمام الرتم
خليني تما نزطم راه دخاخنو
تعلم باللي كثرة الصبر تدبر...
وتعمي العينين إلى ترادفت عليها لمراود
ويرزم حتى واسع الصدر....
........................................................
نبغيك نبغيك ريشة ترسميني
في وجع التراب
تقصي جناح لغراب
ومن كيال المحبة خليني نقيس
شربيل لمحبة ونعبر.....
واش أكلبي المذبوح
بالهم والجروح
نسكت ونكمد الضربة
في كاشوش ليام ولا نهدر......
.........................................................
وانت يا العمر شايلاه وبيك
أنت رشكت في ظهري مّاس لقهر .
وخا نتحاشى رموشك الكاوية
كلبي ينزف بهواك ... وحنت هواك بشواقي
محزم بالهبال يا صابغة لنجال
من عنادك ...من بعادك ماسعفني
فيك موج لبحر ..................
نبغيك ....نبغيك
وإلى انت اعطيتي بالصدة
وجازيتيني بالعضة في وقت الشدة
بجوج موزونات بعت ِ احلامي وورد ايامي
عطشان في غرامك
والما يجري كدامي
وما كلت أح اراسي على زهر.....
............................................................
ياك أزينة بنادم تراب ونحاس
مرايا ومتراس
وأنت ياقوتة لغرام
ارجعت احجر منك العاشق نفر
منك المغلوب كفى وهجر
سلبتي بلا سبة زماني
خلِيتي مكاني
ومكنتيني من احزاني
واللي قرايتو في لواح البها غبر ما ظهر
...........................................
الله يا الله مولانا ويا الله
أش داني نبغيك
وأنت المطلوبة لعرس ذياب
وأنا وليت براني
خليني نكر إلى طوال لعمر....طحت عمى فيك
وأنا منك ليك دم ولحم ..فرحة هم وغم
وإلى طحت معاك ...والمغيار دوى عليا وعليك
حوزيني لصدر ايامك
نرضع من دالية العطفة كاس معتق من مذامك
تتفاجى لدخال ....
وبلا حزارة ..في زمان لخسارة
أنت مرايتي...أنت عنايتي انت قرايتي فوق جمر لهوال...
وانا المسكون فيك وبيك
ها عار والحرف وما خلى ها عاراللي علمونا شلا
صادقيني ولا فارقيني بالجهر....
راني بغيتك حطة ..فيك يتكعد وسادي
عليك يتهرق مدادي ..وفيك ندك بالعشق وتادي
راني بغيتك حطة...ماشي مطة فيها الذياب حطو
كلّ دّا جطو واحنا شاطت لينا من حوض الصابا ربطة ..
واللي صام على الخوف عوام ازينة
على جرانة يفطر...
.......................................
نبغيك نبغيك ...ونموت عليك
وأنتِ كاين اللي بغاك صحا باع عمرو بحالي
ماجنى في حياتو لا حبق لا سوسان / لا شوك لا رمان
مات مسكين شهيد طواه النسيان..
وكاين اللحلاح اللي غرم عليك بالسلاح
صروفو والميزان ..
دّا حب وتبن وخلاك كنازة بلا كفن..
وأنا الملسوع غرمت حروفي أحلام
حلفت حتى نخليك
من دون النسا تشوفي عرس لفخر..
وبلا ما نسى تشوفي شوفة لوقر
في فياقي ونعاسي
من شجرة العز درت ليك حزام..
شجرة ونخلة ورمال... عليها تصدح عيطة الروح.
في الوطى والجبال... حامية زاندة بالجمر
سيري خليني نشرب لبحر
باش نعرف نكر أنا وجميع العاشقين
بسباية الفجر
ونقولوأ بصوت يهرس الصخر..
سيري الله يهنيك
يا الحكومة وانت مولات لغدر..
محمد كابي
الحديدة المغرب
