تلميذك الشاطر .. !!
تلميذك أنا الشاطر
وطول عمرى ..
انا .. فاكر ...
حكاية حبنا
وفرحة قلبنا
وفيها بذاكر
مالى منها الدفاتر
وساكن جوا عينيك
ودايما مشغول بيك
سهران الليل واعافر
ولعيونك الحلوة
أهج .. انا وروحي
ولضي عينيك أسافر
تلميذك أنا الشاطر
وافهم ف الحنين
وكمان رموش العين
واعرف جراحها ..
بتيجي .. منين
والقلب .. لو دب
ف يوم .. وحب
اعرف .. دقاته
رايحة .. فين
وجاية .. منين
وامتى تزيد ..
ف الهوى ..
دقتين
واعرف كمان ..
ف الحنان
واللي يزعل الياسمين
إن كان عود ريحان
أو ورد م البساتين
واعرف .. المقدر
وجاي من سنين
والمكتوب من زمان
ومرسوم ع الجبين
تلميذك أنا الشاطر
وطول عمرى ..
ف الحب .. قادر
وفاقد .. دفعتين
العب لك .. قرداتي
ومعايا .. شهاداتى
مختومة .. بنجمتين
تغنينى عن السؤال
لو الأمر .. كان محال
وصبح ف يوم خطير
معايا .. دبلوماتى
اتنين .. ماجستير
ودكتوراه .. ف الحنين
والعلاج من رمش العين
لو لسع ... مرتين
تلميذك أنا .. الشاطر
ونجيب .. من يومى
واصحى من نومي
امشي .. ع الحبال
واعملك ... طبال
والعب .. بالخيال
ولا أجدع خيال
وصاروخ ف الحب ..
ومهما القلب دب
وداب ف المشاكل
اطلع منها .. ف ثانيتين
زى الشعرة م العجين
تلميذك أنا .. الشاطر
وكله بالحساب
طالما انا واد حبيب
وف الهوى ... لعيب
وطول عمرى ... كسيب
ومليش ف شغل العيال
والقلب فيك داب
ومهما .... بعدت
وطولت ف الغياب
وكله ... مكتوب ..
من عامنول ف الكتاب
يعنى ... متتقليش
ف يوم .. عليا
وتكوى قلبى ..
بنار .. أسية
لا تلاقيني بغنيلك ..
'' العتبة جزاز ''
'' والسلم نايلو ف نايلو ''
واكسر لك .. ف الإزاز
ولا تشوفى يوم حنية
مع قلبي المسكين
تلميذك أنا .. الشاطر
واتعلمت ع إيديك
دروس ف الحب ياما
زي أفلام السيما
من سنة أولى ..
ف الحضانة
وروحى فيك هيمانة ..
أتاريها .. من زمان
شربت من عينيك
كؤوس الغرام والحنان
والقلب لما شااااااب
وداب .. م العذاااب
صبح كتير ناسى
وقلب .. ف الكتاب
وغرقان ف المآسى
واتملى ف العتاب
مفكر إنه يعنى ..
هيقدر ع قلبك
ويطلع ال مستخبى
ويزود ف الحساب
ومش عارف إن حبك ..
صبح ف يوم سراب
من شهور .. وسنين
تلميذك أنا ... الشاطر
ومحير .. البنات
ومدوب .. القلوب..
بالسكر ... النبات
والعمل ... بالنيات
أطلع .. ف عينيهم ..
يوماتى .. وأهاتى
وكله .. بالأصول
وهم حواليا
بالعشرات .. والميات
أغنى .. ع الأرغول
وارقصهم ع النايات
ومهما الليل .. يطول
أغنى لهم أغانى ....
مواويل .. ف عز الليل
على بلح .. أمهات
ورطب ... حياني
والقلب .. لما يسكر
ألاقيه ع الناى يميل
ويحضن ف النسيم
والنسيم .. يبات عليل
والسهرة .. تكون صباحى
بالمغنى .. والآهات
والشهد ... والحنين
تلميذك أنا الشاطر
وفارس ف الميدان
وطول عمرى .. أعافر
وعندى ... كام ديوان
ف الحب .. والغرام
والشوق .. والهيام
رازع سبعين فدان
وأعلم .. ع النجوم
ومخاوى .. من زمان
والقمر .. يشهد بذلك
والأهلى .. والزمالك
واسألوا أهل شبرا
ع اللى كان بيجرا ...
ف شبابى .. واللى كان
واسألوا أهل الحارة ..
حبيت ... عن جدارة
وكله بالأصول
وكله بالشطارة
يا ساكنة نن العين
تلميذك أنا .. الشاطر
اصطاد بالسنارة
وافهم بالإشارة
يا وردة ف نضارة
وحبى اللى من زمان
اللى مالى كل شارع
ومغطى .. كل حارة
يا وردة عمري
انا قلبي فيك دايب
يا بحر .. م الحنان
ومفكر .. إني خايب
وربك المعين
يا نهر من حنين
الشاعر/ منصور أبوقورة
.