جِيتك يا حرفي
كِالبير الفايض
ف جنان البور
جيتك ب لَݣْدَمْ حافي
ف سيفة طيف مخفي
جيتك نتمنى منك
شربة ما صافي
تدّواي قلبي لعليل
وليه تشافي
جيتك وف القلب
غمام وليل طويل
وريحة دخاخان
فيها عَوْدِي الْبَرݣِي
يِحَنْحَن ويحَن
لسّربة مْساوية مزيان
جيتك ودوايتي ..
منها الدم يسيل
جيتك مكثفة بَ سْلاسل
وف عَبُّونِي (شوني) شلّا كلام
ما تقدّو بْخور ولا عْوافي
ولا زبْدةْ الجْمَل وشْكَارَةْ جَمَّالْ
سَوْلو داك لقلم
علاش ف التّيه حاصل
سولو فلان وُفَرْتَلّانْ
شكون حْرث ديك الكدية
بْلا قمح وُبْلا سكّة واصل
وشكون حصد بلا مناجل
وشكون دق ف الباب
ومازال يِتٍسنّى لجواب
وف يديه كبّة شيب وقلم وكتاب
جيتك
بقلم نزهة رصين
