عالم
مجنون!!
عالم يجنن العاقل ويعقل المجنون
ما بين تجاربي سائل وسؤالي إيه راح أكون
رجع الجواب حائر حُر لكن مسجون
بيني وبينه حائل لحظة صفا بيهون!!!!
عيش الحياة متفائل وابكي لرب الكون
وارجع وقول أنا عاقل إياك تعود ملعون
عشنا الحياة نتسائل ليه القوي مفتون
ليه الضعيف مش ثائر ليه الجدع مطعون!؟
دنيا وفيها القاسي فيها اللي قلبهُ حنون
فيها اللي عقلهُ راسي فيها اللي كُله ظنون
فيها اللي ديما ناسي فيها اللي عاش موزون
فيها وفيها مآسي فيها الوجع ميت لون!!!!
أنا وانتوا عشنا سنين خارجين بدون مضمون
وغيرنا عاشها يومين جايب في نفسه جون
أنا وانتوا عشنا ياما قُلنا الزمن مشغول
أتاري الزمن لهُ علامة ديما سايبنا نقول!!!!
أنا وانتوا عشنا كتير كتير كتير مش فاكر
عالم من الأساطير مابين ناكر وشاكر
وفين هما البشر وفين باقي الحقايق
شيء فينا انكسر خلى الوجود مش رايق!!؟
ما بين جنة ونار مشوار اسمه الحياة
نمشيه ليل أو نهار نتقابل في مُنتهاه
والدنيا إيه غير (فيلم) واحنا يادوب لقطات
نرجع نقول لأ (حلم ) والكل فيه لحظات!!
هُدنة وحرب وسلم بُكا دموع وآهات
والدنيا فينا تلم كإننا غلطات
آه يادنيا العجايب فين دفء القلوب
الكُره ب الزكايب والحُب بات مغلوب
آه يادنيا التجارب أخرك تملي غروب
انا البطل المُحارب راجع وكلي ذنوب!!!!!
شعر
عامي
للبلياتشو
وليد حسانين @الجميع
4\4 _ 2024
وليد عوض إبراهيم حسانين
