مصر في دمي
بقلم الكاتب وشاعر البسطاء سعيدسعيدامام
مصر في دمي والروح من طينها
والقلب لو يتعب يرتاح في حضنها
لو يوم تضيق الدنيا على ابنها
تفتح له ابوابها وتقول له انا هنا
بحبها وقت الضحكة في عينيها
وبحبها وقت الدمع مخبي فيها
وبحبها لما الشمس تشرق عليها
وبحبها لما الليل يسهر حواليها
مصر مش بس ارض عايشين عليها
دي حكاية عمرنا والروح فيها
دي ام لما نتوه نرجع ليها
ونرمي حمل السنين بين ايديها
كام مرة شالت وجع ولادها
وكام مرة ضمت خوفهم جواها
وكام غريب عاش عمره في حماها
ولما احتاج حضن لقاها
انا ابنها ولو جار الزمان عليها
هفضل واقف ما ابيعش غلاويها
ولو قالوا لي الدنيا خدت منها
اقول لهم دي مصر ولسه فيها
ممكن ازعل من حالها واعاتبها
وممكن في لحظة من وجعي اغضبها
لكن لو حد قرب في يوم منها
هقف بقلبي وروحي واحميها
دي عشرة عمر ما تتقاس بثمن
ولا تتباع في سوق ولا تتوه في محن
دي نبضة في صدري من يوم ما كنت طفل
ولو خيروني بين عمري وبينها اديها
فيها النيل لما يلمس شطها
وفيها الفجر لما يصحي اهلها
وفيها دعوة ام بتستنى ابنها
وفيها حكايات الجدود في بيوتها
فيها الفقير اللي بيحلم ببكرة
وفيها العامل اللي بيزرع فكرة
وفيها صوت البياع اول مرة
وفيها حضن الام لما الدنيا تمر مرة
مصر يا وجع ساكن في ضلوعي
ويا فرحة بتجري مع دموعي
لو غبت عنها تاخدني رجوعي
ولو قالت لي ارجع ارجع بكل خضوعي
انا مش شاعر بيكتب اسمها وخلاص
انا واحد عاش ترابها واحساسها
ولو خاني التعب في يوم ولا الياس
يكفيني اقول مصر فتقوم جوايا انفاسها
مصر يا بلد الحكاية والسنين
يا ضحكة العيل وسط الطين
يا حضن ابويا ودمعة امي في العين
يا حلم لسه عايش جوا ملايين
ولو يوم سألوني مصر عندك ايه
هقول لهم دي العمر كله بما فيه
دي اول كلمة حب نطقتها شفايفي
ودي اخر دعوة نفسي اموت عليها
ولو الزمن بدل ملامحها يوم
ولو كتر عليها الحمل والهموم
هفضل اقول لها متخافيش يا امي
لسه ولادك في الضهر موجودين
مصر في دمي والنبض شاهد عليها
وفي كل خطوة من عمري امشي بيها
انا مهما اروح وألف الدنيا ارجع ليها
والاقي قلبي سبقني ليها
مصر مش قصيدة تتكتب وتنتهي
ولا كلمة حلوة على ورق تنتهي
مصر حكاية شعب لما يحبها
يعيش عمره كله يحكي عنها وليها
ولو اخر العمر وقف بين ايديا
هقول لها يا مصر دي كانت امنيتي
اني اعيش في ترابك
واسيب بعدي حكاية
تقول اني كنت ابنك
وانك كنت بلادي
وهويتي
مصر ربنا يحميكي ويحفظ ولادك وأراضيها
بقلم الكاتب وشاعر البسطاء سعيدسعيدامام
