ستى .. !!
'' ستى '' الله يرحمها
ويرحم '' جدى '' كمان
وأيام زمان .... زمان
كات صوابعها ..
زى .. المرهم
تمسح بيها ع العيان
يشفى بإذن الله
ويجرى زي الرهوان
جوا وبرة الدار ................ !!
وتلبس الغلبان
توب حنان وأمان
فتهرب القسوة بهدومها
تجري وشايله همومها
ف '' شوال '' '' خيش ''
تطلع ما تجيش
ف عز الليل ...
قبل ما يجى عليها ..
ضى نهار ......................... !!
كات تطبطب علينا
بشويش .. بشويش
وتلمنا .. كلنا
ف حضنها جنب جدار
تأكلنا رغيف عيش
'' مقرمش '' ع صهد النار
ومتحنى بجبنة '' قريش ''
تغنيلنا .. وتدعيلنا
وتلبسنا توب السعد
متوضي بعبير أزهار .......... !!
وتقوم م الفجر
تصحى النايمين
بدعوتين حلوين
متحنيين بحنين
وسلامة نية
نصحى من النوم
ونطير م الفرحة
غية .. ورا غية
بضحكة وملاغية
طالعين زى الحمام
من كااااام بنية
لابسين توب حنية
وكات ترش الدار ..
مية ورد ف عز البرد
وصهد الشرد
وتقول ياللا يا شطار ........... !!
كات تفرش مناديل الحب
ل '' جدى '' لما يعدي
والبيت يضوى ..
بخضار .. وعمار
وتلم العيلة على راكية نار
وبراد الشاى قاعد متقمع
بين الأنفار
وسط صوانى فطار
و '' قلة '' فخار
معطرة الدار
بعطر '' أدار ''
كات .. '' ستى '' ..
تجمعنا بحنانها
وشهد كلامها
صغار ... وكبار ................ !!
وتقوم الفجرية تعجن ..
وتخبز حوانين '' عجوة ''
معجونة بمية " رقوة "
وفطير محشي حنين
تدعيلنا وتوزع علينا ..
حنينها .. وحوانينها
يملا قلوبنا
ونعبى جيوبنا
صبيان ... وبنات
رجالة .... وستات
بطيبة عجيبة
وسلامة نية غريبة
تكفى بالفرح 100
يقوم الفرح .. يفرح
يقضى معانا ساعات
يسهر .. ويبات ..
ع انغام '' السمسمية '' ..
يعشش ف '' خرم '' جدار ...... !!
كات تطبطب علينا
بحنين .. جبار
وتربي الحب ف قلوبنا
يكبر .... ويكبر
ويفرد جناحاته لسابع جار
ولما الليل يخبط ع باب الدار
تفتح له وتنومه على '' دكة ''
ف '' الدهليز ''
وتغطيه بملاية ..
ضفايرها مغزولة حنان
ريحتها .. فل وريحان
بعيد عن الأنظار
وتقوله خد راحتك يا ليل
انت ف بيتك يا جميل
بس حافظ ع الأسرار ............ !!
يتمدد الليل من طوله
ويرمى ع ضهر'' ستى '' ..
همومه .... وحموله
ويروح ف سابع نومة
ولما يصحى الليل ..
قربات الفجر
تحميه .. وتوضيه ...
وتدعي له ...
يارب .. الفرح تنوله
ف '' يبوس '' الليل ايدها
ويقوم يدعيلها
ينجيك المولى يا ستي
من حر النار .................... !!
كات '' ستى '' ...
حاجة كبيرة
ومقامها كان عالى
زي نجم ف السما بيلالي
وماكتش واخد بالى .. !!
تقولشى .. أميرة .. !!
وكل البيت بيدعيلها ...
يارب تنور .. قناديلها
كات زى الريحانة حبلانة
بكل معانى الخير
وقلبها كان بير ..
مليان أسرار ................. !!
كل الستات .. كات ..
منها ... تغير
لأن كلامها كان ..
مغزول بحرير
والعيبة تخبيها ..
ف شيكارة خيش
جوا الدار
بعيد عن عيون '' جدى ''
ولا يطلع منها .. العيبة
ولا أى ... عوار
لا ليل .. ولا نهار
لجل اليوم يعدى ونعيش
تحت '' ستار '' ..
رب كريم ستار ............... !!
الشاعر/ منصور ابوقورة