بغى يحكم ***
بغى يَحكم ...
ؤ يعود قمة في لهرم
طماع كبير
لكذوب وتسرسير
راكب عليه ملاطي ...
وحلف ما يحشم
يولي سي سيد وحنا عبيدو
يعمر طحرورو ومن السحت يزيدو
زرع الشك والظن ...
والغد رجع مستفهم
بانت عيوبو
جلد وقهر وعمر جيوبو
ركب الجهل وباع الاخرة بالدرهم
بغى يحكم
يولي من اهل الحكمة وسَداد
كور وعطي لعور حتى غابوا لجواد
صاحب حاجتو إنتهازي جلاد
عزف على وترة لقطيع ...
وعلى كل عمومي رفع يدو وبصم
زاد لمعلوف
لقاري ولحر ردوا محذوف
الجشع والضلالة ...
وعاون على حلب لبقرة ومن دمها اغنم
بغى يحكم
حيت لقاها ساهلة
التنوعير والكفة ليه مايلة
شي دخلوا الجنة ...
وشي دخلو جهنم
واخا لعمر به غادي
باقي جلدة داخلو سادي
لقى طينة سراطة ولمراقة ...
منافق ولسانو ما نفث غ السم
بغى يحكم
فكَاع من هبْ ودبْ
عاد بوشان من خطف ونهب
ولف التتيف والشتيف ...
وحسابو حبل مرطب والرجم
ما عدنا بغينا تمثيل
من الجزارة والشناقة والويل
سيق الخملة ...
راه غ شلاهبية وأعداء لوطن
بل صحاب الاجندات
ساهل يرهنوا كل لارض ولحياة
عصابة فرقش وفرشخ ....
ول يهدر يغبروه في اليم
بغى يحكم
واخا ما يصلاح
دافع سنطحتو وحلف إيلا فهم
وحسن ليه ولأمثالو ...
البركاسة وزطم
***الشاعر والزجال:أحمد الكندودي ***المغرب
