أمي
🎶🎶🎶
كنت عاوزة أكتب قصيدة
لاقيتني للأحزان دي صيدة
والدموع عملت مكيدة
فسمعت فايزة ويا شيبة
يمكن أطلع بجملة أكيدة
تكون لي مطلع غنوة مفيدة
ملقيتش غير قصة حزينة
أولها جملة بحواديت كتيرة
بدايتها هي
: أمي ماتت :
،،،،،،،،،. ،،،،،،،. ،،،،،،،،،،،.
أمي ماتت وانا صغيرة
إنت فين فينك يا أمي
كان نفسي منك أحس ضمة
وأشوف ملامحك بيا فخورة
أول ما اخطي يوم لوحدي
وأسمع لسانك بيقول لي إمشي
وأشوف دعاك ليا في عصاري
وألاقيكي ساجدة بتدعي ربك
وأقلد سجودك
وتعلميني أول ماأكتب
وإنت ماسكة معايا قلم وتقولي
الألف دة شكل العصاية
والباء مشنة تحتيها نقطة
كانوا العيال عاملينها غنوة
والاقيني تايهة مش فاهمة حاجة،،
،،،،، ،،،،، ،،،،. ،،،،، ،،،،، ،،،،،.
مش فاكرة إنك مسكتٍ إيدي
ومشيتي بيا وسط الشوارع
تجيبي لي لعبة زي صحابي
كنت بخاف في وسط نومي
وأصرخ أنادي وأقول يا أمي
ألاقي بيتنا حيطانه باردة
تعرفي،،،،
سناني وقعت سنة سنة
محدش مسكها ولا سمعت
" كلمة ،،شمس يا شموسة ..... " إيه؟
مش فاكرة إيه كانوا بيقولها
وكبرت حبة إحتجتك أكتر
إبن الجيران مرة عاكسني
فرحت حبة لا كنت خايفة
شعور كدة مش فاهمة ماله
مهما كبرت لساني طفلة
نفسي في حنانك ويا أمانك
و بقيت عروسة عاوزة نصيحة
دورت عالفستان والحاجات
وأهم حاجة عيونك إنتِ
ترقيني دايما وتقرا آيات
من عين حسود حاقد غيور
وعيون محبة وفيها دمعة
دمعة فرح أول مأقيس فستان الفرح
وترقص معايا علي أغنية
كل البنات ترقص عليها
(أمورتي الحلوة)
عيوني تاهت مفتقدة حاجة
لا حاجات
كل إللي كانوا جنبي وقتها
حبة بنات شغلاهم حياتهم
و سمعت همسة جنب ودني
لواحدة ست قارية ملامحي وحست بحيرتي
قالت ومشيت
" مفيش يا بنت زي أمك "
وجعت قلبي بكت عيوني
حسيت ساعتها إني يتيمة
والله نفسي يكون لي ذكري
منك يا أمي ولو حتي قسوة
عارفة يا أمي
كل اللي منك برواز في حيطة
وحتي صورة باهتة وقديمة
من غير ملامح من غير حبيبتك
أكلها الزمان إستكترها عليا
بيقولوا حضن الأم دنيا
زي دنيتنا كدة وفيها عذاب ويا ضني
آهين يا أمي
ملقيتش ليكٍ صورة معايا
ولاحتي دمعة بايتة في جفوني
كان نفسي أبقي شاعر بربابة
وأقول وأغني عنك ليلاتي
وأقلد أميرة وكلام هشام
( وأوعي تنامي قبل متصلي العشا )
( ونصايح ستنا المفتشة)
طب قوليلي
هو صحيح حضنك أمان
.... ........ .......
بقلم 😢 أميرة الغرباوي 😢
🎶🎶🎶🎶🎶