عمل زجلي مشترك بين عبدالله الخفيري ونزهة رصين من توقيع الزجال عبدالله الخفيري
بعنوان : لكيَّة سبابها اَنْتِيَّا
ولّفت نعيش مسلّم
ومع حبابي نتكلّم
الدنيا بلا عشران
دهليز ظلام
نويتك تكوني
سرّي ف لحلام
دمعتي ملّي نتقهر
بسمتي ف النصر
وخيمة تحميني م لحر
السّاع تكويت
والكية سبابها نتيا
لبَّستيني ثوب مرقَّع
وزدتي حلاسا عليا
غطست ف بحر لحروف
نطرز منّو لكلام
نقيت الحرف المحسوب
من مداد مسكوب
عل الدّربالة لِّلي عليّا
مسدت على صدري
تفكرت الگاشوش
لي كان يحن عليا
سقط اللثام
بان لوشام
طاح اللَّجام
لي بيه واخد الزمام
والعاود للي سرجت
هرب عليا
تكِّيت راسي عَلْ لَخْوَا
نشكي ..
شكون سمع ليا
هادي قصّة
غزلتي حايكها انتيا
هاج بحرك عليا
وماني ماهر عوّام
حضنِّي بَمَّاجُو
حضنة الحية
أنا ليك ..
ف غربتي نَّاديك
العاوْد لِّي سرَّجتي
يبغيني ويبغيك
عَنوَة قطَّع اللَّجام
زَوَّل اللثام
طيَّح السَّرج وَصهَل
كِ البَرق عندي وصَل
عاود لي عَلْ لَعدَا
للِّي حَبكُو لَكلام
زَيْفُو لَحكام
بالشّر حَطمو لحلام
خلاّو لَجفا بِينَّا
ركام على ركام
تَهْنا ف درب الزمان
للِّي نطَق بْلاَ لْسان
آلْمَصرَف تَلَّف لمسار
ف شْعاب لُوهَام
وَحنا ما سايقين خبار
الكلمة تشتتات
لحروف تجلات
الطّعنة م لقريب جات
ضاعت لسرار
تكوينا بلجمار
مشات العفَّة
زندت النّار
الكيّة جات م لَجْوار
عبدالله الخفيري
