( شعر شعبي )
يا..طفل تمشي في الطريڨ غريب
شعر: بلقاسم بن سعيد
يا..طفل تمشي في الطريڨ غريب
توزع سنينك....... للعباد إبلاش
جميع العباد إخذت فيك إنصيب
أو ما سئلت في لحظة حساب إللواش
عظمك عصرت لليتيم أحليب
ثوبك إفرشته للعرايا أفراش
لنسان و لى في مثابة ذيب
أو هاذى المداين للذياب أحراش
صدرك صغيري للجميع إرحيب
لمتى... تحب الكل و لوقتاش
أرض الموده تحولت تعذيب
إجميع البرايا تحولت لحناش
و الورد يبكي في زمان أعصيب
خيم عليه اللغم و الرشاش
أو كل الأغاني تحولت لنحيب
و الموت عشش في النفوس أو عاش
يا... طفل شعرك راهو إغزاه إشيب
أو هاذى السنين إتمر ماااا.. تصفاش
ما...زلت تخدم في الجميع غريب
جرب تشوف الغير يتعناش
خوذ النصيحه لا تخاف إتخيب
أو قلبك صغيري اليوم يتهناش
غنى المحبه.. جاك وقت إخصيب
أو حبك بدى.. في العين ما يخفاش
جات الحبيبه ترتبك ترتيب
أو تملى حياتك حب ما... يوفاش
أو ماااا.. زال بلقاسم كلام إيجيب
سعيدي عليه الشعر ما يغلاش
شعر: بلقاسم بن سعيد
مدينة سوسه-تونس