كراسي فاضية
#شاعرـالبسطاء #سعيدـسعيدـامام @ إشارة
ببص للساعةوعيني بتروح على الباب
واقول يا رب اجمعني تاني بكل غايب واهاب
هلالك هل ونوره طل يواسي فينا
لكن الفرحة ناقصة ودموعنا في عينا
يا رمضان يا مجمع القلوب الحزينة
فين الضحكة اللي كانت في لمتنا هادينا
يا ليل رمضان قولي راحوا فين الطيبين
سابوا الكراسي فاضية والقلوب في حنين
كان الفانوس بينور بضحكة من الشفايف
دلوقتي نوره باهت والكل خايف
كانت اللقمة هنية والقلب راضي وسعيد
دلوقتي بناكل والوجع في الروح بيزيد
يا مدفع الإفطار صوتك وجع فينا الحتة
اللي اشتاقت للمة والصحبة والضحكة
يا غريب في بلاد بعيدة يا شايل الهم ومخبي
يا رب هون عليه ورجعه لحضن بيتنا وتلبي
يا مصلح الأحوال يا عالم بكل اللي فينا
ببركة الشهر ده ارحم تعبنا وداوينا
احنا غلابة وعشمنا فيك يا عظيم يا رحمن
افتح لنا بابك وامسح من قلوبنا الأحزان
ومهما الدنيا ضاقت وصعبت علينا الأيام
كريم انت يا ربي وبتبعت لنا الأحلام
رمضان كريم يا اللي بتجبر خاطر المكسور
بكرة ببركتك ترجع بيوتنا تملى الدنيا نور
يا رب رجع كل غايب لاهله وناسه
واكفينا شر الوحدة ومر كاسه
رمضان يعني اللمة يعني ريحة الحبايب
يعني الفرحة اللي بترجع لكل قلبا غايب
ختام الكلام يا رب تقبل صلاتنا ودعانا
واجعل رمضان ده فرحة ونور في سما دنيانا كلمات وتأليف شاعرالبسطاء سعيدسعيدامام