موجوعه يا غايب عني بقلم
شاعر العروبة عبدالله العمراني
موجوعه ياغايب عني
في شوق الزولك عاشقاه
المدة طالت ليش سايبني
انموت وانعيش محروقه بداه
وكل يوم حزينة عازلني
في غرامي صايبني شقاه
فكر في عذابي واحضني
وساعدني في ماتمناه
نكسب زولك بيه تغمرني
بهواك الغالي امراجياه
قلبي لجنابك حايزني
فارض عني انسير امعاه
وما عندي قدرة جابرني
وراغمني انتبع ارضاه
كون كريم في الراي طاوعني
حبك يكوي صعيب اشفاه
وبيدك اعلاجي ارحمني
جمرك صاعق عنيد اطفاه
اسمع. قولي بلله افهمني
وحبي ليك اياك تنساه
ياغالي ياريت تنقضني
غرامي بيك ليعه مقواه
تعالالي وأنت اللي تشيلني
حس بحوالي يكفي اعياه
سهمك في قلبي صايبني
زولك عندي كبير غلاه
