( شعر شعبي )
يا...شامخه ونتي الشموخ إبعينه...
شعر: بلقاسم بن سعيد
يا..شامخه ونتي الشموخ إبعينه
يا..دافيه يا.. حنينه
يا..عزتي طول العمر و سنينه
يا..شامخه يا.. إبلادي...دفئك أحظنته في صحوتي ورقادي
و طنت حبك في خلايا أولادي
و العز إنتي موطنه و عرينه
شمس الكرامه على الجميع إتنادي
شع نورها في باديه و مدينه
في تربتك موحال ما إنسلمشي.....
أو بعدي عليك اليوم ما إنجمشي
و علاش في ها الوقت ما نحلمشي
تولي العداله راسخه و متينه
أو من يحكمك مجبور ما يظلمشي
لا ظلم .. لا مسكين لا..مسكينه
كي قلت حبك نشوه................
ما هو حديثي غش و لى رشوه
حبيت نمسح على العيون الغشوه
وى إبوح قلبي إبسر في تكوينه
أو لنسان مهما إكسب أو حقق شهوه
حب الوطن إيزيد في تزيينه
كما... الورد إذا فتح...........
أو حسنه على إجميع الخلايڨ صبح
كي توضعه في إمكان ضاوي يصلح
حسن المكان إيزيد في تحسينه
أو لنسان مهما في غروره جنح
إيجي وقت يصبح كدس في تركينه
يا... رفقتي يا.. ناسي....... .........
ممحون بالحب إللملكلي إحساسي
بحب الوطن اليوم رافع راسي
أو مااااا..زلت حبه نشتهي تخزينه
حب الوطن ما هوش عرك إكراسي
ولى.. إشتايم جارحه و ضغينه
ما.. تعرفوشي إخطرها......... ....
فرڨ تسد اليوم يا... مخطرها
حروب القبايل ها الزمان إطمرها
ماضى... تعدى... سودته إغبينه
إنحبو إبعضنا إبلادنا إنعطرها
أو ما... نجعلوها لظلام إرهينه
فا أعداك ديما إنخاصم...................
يآللي غرامك في إجواجي حاسم
بمحبتك قلبي نشيط أو باسم
و الروح فاحت حب كي اليسمينه
يا... ابلاد وفاك الوفا بلقاسم
سعيدي معاني العز فوڨ إجبينه
شعر: بلقاسم بن سعيد
مدينة سوسه-تونس
الصورة من تصميم منيه المرابط
