وجه من مدينتي ..... للأستاذ. إدريس العمراني

#بدون_مكياج

عاملني كإني مش شاعر  ..

وشاعر بيك .

ومستنيك ..

عشان تختم لي تأشيرة  ..

توصلني ..

هناك  .. عندي

ياريت ابقى في يوم هندي  ..

ولا أبقى في يوم غرقان 

أنا مش ضد اتوه في العمر مِيت مرة ..

أنا ضد اني اكون مرَّة 

أنا دايماًٰ ومش دايم 

بلاش اللعب بالألفاظ ..

عشان فيه ناس بـتتضايق

ماتتضايق ..

أنا يعني بـاقول حاجة مابـاعملهاش

خرِست وخفت مش فارق 

فـثُرت وقُلت مش فارق 

بما إني مانيش فارق في مَيتينْهُم ..

خلاص راح اسيب سواد عينهم ..

واعيش جوايا من تاني 

أكيد أفضل لي من دينهم

أنا آمنت بيك يا رب ..

ومش عايز أعيش غير بيك 

بجد بجد تبت إليك 

ومش عارف أعيش من غير  ..

ولا بالغير ..

ولا لوحدي 

أنا فاض بيا من بلدي ..

ومش راح اسيبها يوم عمري 

أنا باصص على الخير اللي جواها ..

وع الناس اللي جواهم حاجات حلوة  ..

وع الأمن اللي مش فاكرُه ..

وع الخوف اللي مش ناكرُه ..

وع المعنى اللي مش ذاكرُه ..

وع الجنة اللي لو هـاصبر هـالاقيها  ..

وع النار اللي مش عايز أعيش فيها ..

وع الدنيا اللي لو تبقى بلا أوهام ..

هـتبقى بجد مستاهلة

بدون 

       مكياج 

                 أكيد

                       أحلى

 #أحمدالسراج