ثورة
للمشاعر!!
بَتْرَجِمْ إحساسي ف سطور والحقيقة مش جديدة
شخص عايش ب الشعور بس دايما ع الحديدة
قولت ثورة للمشاعر وبقصيدة تكون فريدة
والكلام مفعوله ساحر صفحة أولى في الجريدة !!
بس يا خسارة الحياة عكس أفكاري الجميلة
قالوا كافر ب الإله والفكرة صبحت عميلة
منفي زي الكلمة نفي عاري من كل المعاني
ع الخدود لطمة لكف والتُهم كانت أماني !!!
ليه ماقولش طب هقول لما قولت قالوا قال
يومها وداني الفضول للسجون والليمان!؟
بَتْرَحَمَْ على كل لحظة عدت من غير اهتمام
كنت معدوم الملاحظة والسكات ب السر دام
الحياة إيه غير تجارب والتجارب لك دليل
لو صحيح إنك محارب إوعى ترضى تعيش ذليل !!
الحياة بين البينين فيها شجر العمر طارح
هي أجمل ب الحنين بين لياليها المطارح
للحياة شبابيك كتير بُص منها بدون ما تفضح
لو حقيقي إنك كبير خلي غيرك فيها يفرح !!!!
الحياة ضلمة ونور فرح جرح للدقيقة
رغم عشقك للظهور تلقى ماسكات للحقيقة
هي شوك ب الزهور فيها شك وفيها ريبة
يوم م ترحل صوت يقول هي اكتر من عجيبة !!!!
شعر
وليد حسانين
وليد عوض إبراهيم حسانين/
القاهرة /مصر/ 22/4/2026/
