وجه من مدينتي ..... للأستاذ. إدريس العمراني

خليك 

فاكر !!

خليك فاكر غيرك راح         وانت عايش لسه مابينا

سيبت لشعبك كم جراح      رغم براح الدنيا سجينا

لو حقيقي ان انت صريح    قُول للناس   كلمة حق

تبني مقام  للشعب ضريح    بس مابينا وبينك  لأ !!

خوفتنا  من كلمة    ليه         مش محتاجة  ندخل شق

إحنا  بنسأل   ديما  إيه         وانت بتضحك وتقول هِئْ

خوفتنا من أيوة    وآه         حتى يقينا     أصبح  شك

مش محتاجة  نقول  لله       ولا محتاجة  نعيش في العك!؟

خليك فاكر  شعبك  صابر      وانت مازال الكِبْرْ مَلِيك

ظُلم الظالم  كله  مخاطر       بس  جنون العظمة  لَهِيك

خليك فاكر  شعبك خاطر       وانت  لابس  وش  ملاك  

عدل العادل  جبر خواطر       اصل السلطة آخرها هلاك!!

إوعى تفكر شعبك خايف         تبقى صحيح وبجد عبيط

شعبك غمض عينه وشايف      وانت مفتح عين في الحيط

إنتي  يا هانم وانت  يا بِيهْ      قولوا عنه  كلام مفهوم

قالوا   عنه  كلام مش فِيهْ      قالوا إنه كمان  مظلوم

كلمة أخيرة  لازم  أقولها        إني بجد ياناس مصدوم

سِكت الكُل وخاف ينشرها     قالوا  أكيد  الواد  مفروم!!!!

شعر

عامي

البلياتشو

وليد حسانين 

/وليد عوض إبراهيم حسانين/

القاهرة /مصر/25/4/2026