Arroub: " غرايب لفقيه " (1)
بسم الله نبداها
حكايتي خرافا
لساني ليكم حكاها
كان حتى كان
في الدوار فقيه
بتقوى و الايمان
هكذا حين عرفناه
مسكين
غير طالب
حامل كتاب الله
غشمي ... نية
ولد باب الله
يتبع .......
[10/05, 20:19] Arroub: " غرايب لفقيه " (2)
براني
غريب في الدوار
لقبيلتو مهجار
يعمر بلاد
و يخوي بلاد
في دوارنا يا لجواد
عناو بيه رجال لبلاد
قصدهم
و المقصود الله
كرموه .....
لباسو جلابا
فوقيا . بلغا و سلهام
سكناتو بيت في جامع
و كل جمعة بالحساب
من جيبهم ليه الحمام
يتبع ......
[10/05, 20:19] Arroub: "غرايب لفقيه " (3)
طال بيه لمقام
بجماعة يصلي امام
لوح . سمق و صلصال
صبيان يقراو القرآن
يعلم الصلا
و النظام
فرضو لو شرط لعام
و مونتو كل وقت
نوبتها كل دار
زيد لعراضات
و زرود لقبيلا
هاذي صدقا
هذا عرس
هاذي ختانا
و زردا لكبيرا كنازا
يتبع ...............
[10/05, 20:20] Arroub: " غرايب لفقيه" (4)
حدو حد جامع
ما يديع
ما يربع في مجامع
ناس الدوار عجبهم الحال
قوى فيهم الايمان
يحدثهم .....
يقرا سوار
لفجريا و لعشيا
ما ينسى حزب السنية
رواسي ما يكساب ما يعلام
زوفري
قاهراه لوحدانيا
عز عليهم
وحدو راسو
حسنو بيه
زوجوه مرا قبيليا
شابة في عز لعوزوبيا
نقرا في يغبر نحاسو
جعلها اهلو و ناسو
لمصونا بنت الحاج سلام
وحشو في الذرية
ما بطاشي
كرمو الله بتوام
يتبع .............
[10/05, 20:21] Arroub: " غرايب لفقيه"(5)
تهلاو فيه
جمعو شي بركة
كرمو لفقيه
في عينيهم
كيف الما لقليل
عرفوه المحسنين
حباب الله
اهل جودا
هدايا ....
لباس و فلوس
دور ناعورا
دار بيخير
ولى لباس
عرفوه بزاف ناس
بعد ما كان الله ... الله ....
زغبو الله
كال اش ندير
شرى ليه مويطير
بان فيه شي من لعجب
عاد باغي يطير
جامع ما بقاش يعمر
يوم على قدو يغبر
بطل لفجر
و صلاة الوقت ياخر
هاذ شي غريب يحير
ناس الدوار شغلهم الأمر
بغاو يعرفو
واش تما من سر
يتبع ..............
[10/05, 20:21] Arroub: " غرائب لفقيه"(6)
من جماعة جعلو رقاص
موراه يتقصى لخبار
واحد نهار
قبل ما يروح ليل
جاهم اليقين
خبارو بالدليل
عين الرقاص لي شافت
ما كذبات
بامانة
و اليمين ادات
لفقيه لي كان ولد باب الله
حارو فيه عباد الله
سبحان مبدل الاحوال
لاح جلابا و سلهام
هجر المحراب و القيام
يتبع ........
[10/05, 20:21] Arroub: " غرايب لفقيه" (7)
يرافقهم .....
شبان دراري
ما بقاش دوار يعنيه
جماعة حارو فيه
بلا قياس
طوال رجليه
ما تلا حد يقدر عليه
ضعيف ايمانو
غلبو شيطانو
همل صلاتو و قرآنو
في ناس دوار ما بقاش يحير
لفقيه لي كان يتسنى شرط و لعشور
و لى يعرف روايح و لعطور
و لباس ... مودلات ....
و ماركات .....
جا من خالطو و داه ....
لفقيه ولى مخصوص من دواه
غير الله يكون معاه
يتبع .....
[10/05, 20:22] Arroub: " غرائب لفقيه "(8)
لفقيه لي كان غير طالب
نية ...
غشمي و دريويش
منو شفنا لعجب
ما بقاتش عليه دوز
لكبيرا في لهموز
عينو عليها .....
بها يفوز
تعلم لفعايل
قرا نواعر
دوايا و لقلم
سلاحو.... واعر
و شلا امور
جراهمي ....
شلاهبي ....
عرف دروبا و لمسارب
يتبع ..............
[10/05, 20:22] Arroub: " غرايب لفقيه"(9)
مشوق في لمطور
تيليفون
و ليصانص فابور
على زرود يقلب و يدور
الجمعة يمشي لقبور
ما يقراشي فابور
حامل كتاب الله
بايع فيه و شاري
يتفاصل على سلكا
و رقيا لصبيان دراري
حتى شاب عاد دارو ليه حجاب
سبحان رب الارباب
يبيتها في شان
و يصبحها في شان
لفقيه تحلو عينيه
شفنا فيه لمشتاق حين فاق
يتبع ..........
[10/05, 20:22] Arroub: " غرايب لفقيه" (10)
وجوه غريبة تجول الدوار
محسوبهم ليه رفاق
كثر عليه لقيل و لقال
فعايلو كثرة بالعرام
تساوى عندو لحلال بالحرام
من غير سوال
ولى غير درام
صايك و زايد لكدام
هاذي يدو فيها
و ثانيا يطلب الله عوينو عليها
وحدة تنسيك في ختها
دايرها يغرق فيها جمل
و باقي زايد فيه
ما يعيا و لا يمل
حالو من حال الوحدة في النمل
حين بغا ربي يعذبها
جعل ليها جنحين
يتبع ...............
[10/05, 20:23] Arroub: "غرايب لفقيه"(11)
حلق اللحيا
كلع الحشما و لحيا
و عرف شحال من بليا
يسبب ... يحرز .....
يضرب لفال ......
يهز الخط .....
يفرق .... يلاقي.....
يقرب لبعيد
يبعد لقريب
يجلب سعد
يدير لقبول
يجعل لعدو حبيب
الدوار يغلي بالغاشي
الغريب كثر .......
شي غادي و شي ماجي
و الرقاص باقي عساس
يتبع ............
[10/05, 20:23] Arroub: " غرايب لفقيه"(12)
و شي مرا بليل
شبان الدوار سهرانين
وقعت منهم العين
خيالات في ظلام
شبان غراب
محملين لفقيه
ما هزوه رجليه
شارب ما يكفيه
حضرو ناس دوار
كلشي يتشفى فيه
اللعنا و السب عليه
الحاج سلام نسيبو
علنها براءتو منو
بنتي بولادها في عياني
و هو ملعون مطرود
كيف ما جا براني
يخرج براني
و كان هذاك اخر نهار
فيه شفنا لفقيه في دوار
يتبع ..............
[10/05, 20:23] Arroub: " غرائب لفقيه "(13)
ما بقى عندو فاش يحير
وجهو ملبس حلاسا
قناعو قزدير
تساوى عندو لحلال بالحرام
يجدول بسماوي
يبخ و يداوي
كبرت عينو
و لى يلعب طويل
ما حاز من حرام
في عينو قليل
تحلو عينيه
طمع عماه
كبرت كرشو
عاد يقلب على لهموز
يحفر ... يعزم على لكنوز
بزعامة شيطانو
لي غرير....
طوالو يديه....
صبي صغير
في لونو عينيه
عرفو زوهري
تلوط عليه
خلى ميمتو عليه تبري
يتبع ......
[10/05, 20:24] Arroub: " غرايب لفقيه"( 14)
طاح فيها برجليه بجوج
مصيبة ...........
بغاها كلها.... خلاها كلها
طمع في لكبيرا من لهموز
جابها ربحة لكنوز
لخلا و لقيفار
و لمهجور من لوكار
لفقيه تعرى امرو
و قبل وقتو
تلبس بظلام نهارو
خطا صواب من سوارو
فضحو الرقاص.....
جاب خبارو
من شر فعالو
لفقيه تبهدل حالو
عاد عليه بالحرام
كل من كان حلالو
لهندقا و زنقا
لا متاعو بقا
لا وجهو تنقا
تفقدات فيه ثقة
" غرايب لفقيه" (نافذة الختام )
...............و ختامه زفت .............
لا من عاد يجعلو صديق
لولادو ما بقاش يليق
ما عاد لمراتو رفيق
بينو و بينها
فرقت طريق
لهبالو ما بقات طيق
سلكت نهج التطليق
ليها و ليه بالخلع فريق
كيف دخل لدوار براني
خرج منو براني
لمصايب عليه ركبات
ركبو لهبال
عاد غادي و يهتهت
آخر يامو
تلطخت حياتو بزفت
بها غرايب لفقيه و لقصيدة ختمت
و ختامه زفت
البوهالي عروب
مكناس23/05/03