سلسالي "بالعامية"
بقلم الكاتبة والشاعرة
حنان فاروق العجمي
ومهما تربُط سلسالي
حرفي هيصرخ يتكلِّم
قَيِّدني وقوم باستبدالي
صوتي هيعلا وهيصَمِّم
اهزمني وغَيَّر من حالي
حزن كفوفي هيِتْظَلِّم
اكسرني وطقطق ف ضلوعي
للظلم لا يُمكِن هسْتَسْلِم
قول إنِّي بَخَرَّف
وكل كلام الحق بَحَرَّف
اتْكَرَّمْتْ عليَّ يا سيدي وأنا المحقوق
ولثِقتي فيك كُنتْ ملحوق
وبإيدي ضَيَّعت كل حقوق
أنا إللي طَيَّرت حمام بيْرَفْرَفْ
شِلْتْ حمول ضَحِّيت قُلت اتْصَرَّف
عَمَلْتَك حاجة كبيرة أنا المجنون
من خيالي مَحيت كل ظنون
خيال أفلاطوني سامحني موهوم
القسوة عندي شيء مش مفهوم
الصدمة خَلِّتْني محموم
خيوط الشمس لشِبَّاكي تدُق
فَتِحتِلها لإنِّي بطبعي بَرِق
رغم قيودي ورغم سَكَنِّي البَرق
عايش الرُّعب ف كل ظروف
بحاول أحبس أنفاس الخوف
رغم الأسى لعِزِّة نَفْسِي معرفش أخون
ف نَظَر الخُبْث أنا الملعون
أمل روحي يشُق الغيوم
وهرفُض أعيش يوم بيوم
هرسِم مستقبل يمكن مِش مضمون
عن مبادئي مِشْ هتنازل هعرف أصون
أنا المجنون أنا الملعون أنا الموهوم
ويا بختي لو أنام مرتاح مظلوم
رغم دموع الصبر عليَّ بتْلوم
مآمِن ظلمي على ربِّي مِشْ هيهون
قادر يِوْقِفَك
إن أراد شيئا قال كُن فيكون
ف مفرمة الظلم قلبي افرُم
ينزف حِبرُه ولروحي يرَمِّم
بُقعة جنب بُقعة بتتكلِِّم
