لسه الهوى عايش
بقلم الكاتب الصحفي وشاعر البسطاء سعيد سعيد أمام
قالولي كفاية حب ده العمر عدى وفات
قولتلهم الحب عمره يوم ما كان بالسنوات
ده الحب نبضة روح بتعيش مهما الليالي فاتت
ولو غابت شمس العمر أشواق القلوب ما ماتت
قالولي شعرك بيض والوقت سبق خطاك
قولتلهم الأبيض تاج من السنين اللي عاشت هواك
ده كل شعرة حكاية وكل نبضة من لقاك
وكل حلم جميل عشته يوم وأنا معاك
قالولي إيه لقيت فيها يخليك عاشق كده
قولتلهم لقيت عمري اللي ضاع ورجع بعد المدى
لقيت حضن الأمان بعد التعب والعنا
ولقيت في ضحكتها ألف فرحة متخبّية هنا
أنا مش عاشق صورة ولا مفتون بالجمال
أنا عاشق روح طيبة تشيل الهم في كل حال
إذا ضاقت بيا الدنيا ألاقيها خير ظلال
وإذا مال بيا العمر تسندني وقت المحال
يا ناس سيبوا القلوب تعيش على راحتها شوية
ما كل روح في الحياة ليها حكاية مخبية
فيه قلب يعيش سنين وما يعرفش معنى الهنا
وفيه قلب في لحظة حب يلاقي الدنيا هنية
دي لما تضحك يضحك العمر بعد السكات
وتطرح في قلبي ورد بعد سنين الآهات
وأحس إني لسه ببدأ أول الحكايات
ولا كأن العمر مر ولا عدى بالسنوات
قالوا الهوى للمراهق قولتلهم لا يا ناس
ده الحب رزق من ربنا مش حكر على ناس
ده اللي يدوق صدقه يوم يعرف قيمة الإحساس
ويعرف إن أجمل عمر هو عمر الإخلاص
أيوه بحب وهفضل أحب طول ما الروح فيا
وأحكي للدنيا كلها عن أجمل ما لقيت فيا
دي مش حكاية عمر ولا حسبة سنين شقية
دي حكاية قلب لقى قلبه وعاش أجمل هدية
كلمات وتأليف شاعرالبسطاء سعيدسعيدامام
