فين الرحمة والإحسان ..؟!
هى الدنيا ... لسه بخير .. ؟!
لما ناكل ع الموائد لحم بعض
زي فهود .. ونمور .. وأسود
زي حيتان ... وكواسر طير .. !!
ويموت فينا 1000 ضمير .. !!
لما الأخ .... يطخ أخوه
يضرب أمه ... ويلعن أبوه ..
تبقى الدنيا .. لسه بخير .. ؟!
فين الرحمة .. والإحسان .. ؟!
لما الجار ..... ليل ونهار
يعيش مذلول .... ع ايد الجار
يشوي عرضه .... ع جمر النار
ويعيش مكسور ذليل محتار
على باب القهر .. قاعد محتار
وجاره الحلو ..... ظلوم غدار
ظلمه كتير ..... وعايش جبار
تبقى الدنيا ... لسه بخير .. ؟!
فين الرحمة .. والإحسان .. ؟!
لما تكون .... ف يوم محتاج
بين الأهل ...... والأحباب
بين الجيرة .. و الأصحاب
كوباية مية .. وكاس حنية
يقولوا عنك ..عيرة العيرة
تلقى الصد ..... وذل الرد
وسوء النية .. كإنك جاى ...
من كوكب تانى .. وتمشي تعانى
تقول .. آه يااانى
تبقى الدنيا لسه بخير .. ؟!
فين الرحمة .. والإحسان .. ؟!
لما تشوف الكدب بعينه ..
قاعد يلعب .. ف أدمغة الناس
وتشوف الراجل .. منك يهرب
يطلع فجأة .. عديم إحساس
زى التعلب .. يضرب .. يقلب
يعمل فيك 50 مقلب ..
ويضرب راسك كدا .. بالفاس
وف لحظة تكون
حزين .. محتاس .. !!
تبقى الدنيا .. لسه بخير .. ؟!
فين الرحمة .. والإحسان .. ؟!
لما يبيعك ...صاحبك يوم ..
ف سوق الغدر .. وليل الهجر
وانت جنابك .. شايل همه
ودمك .. دمه .. !!
حاضن قلبه جوا عنيك
ويركب فوقك ..
بظلم .. و '' فجر''
تعمل .. ايه .. ؟!
تبقى الدنيا .. لسه بخير .. ؟!
فين الرحمة .. والإحسان .. ؟؟
لما تحس إنك عايش ..
ف حضن أسود ..
وسط ديابة ووسط فهود
جوا .. الغابة ف حضن ديابة
ان غمضت ف لحظة عينيك ..
رحت يا بابا ..ف شربة مية .. !!
ونقول عليك .. رحمن يارحيم
والوضع .. أليم
فين الحب وفين الرحمة ؟!
وفين الخير جوا الزحمة ؟!
تبقى الدنيا .. لسه بخير .. ؟!
فين الرحمة .. والإحسان .. ؟!
الشاعر / منصور ابوقورة