شارع
الحياة
للبلياتشو !؟
الدنيا ليه زحمة عالم من الأفكار
ضارب كده لخمة ماتسيبها ع الستار
خايف من امبارح وبكرة لِيه رايح
الليل لو جارح لازم يزوره نهار!!!
شارع الحياة طويل عَفَرَة و غبار و شرار.
حاضن تلال مناديل والدمع فيك احتار
نفسك تلاقي دليل بس الحياة أسرار
سامع طبول الخير والعُمر لينا مزار!!
عدت ليالي الجدل عدت ومين اختار
و لكل واحد أجل لازم يعود للدار
الدنيا بحر تجارب بين الفرح والدمع
فيها اللي عاش ب يحارب فيها اللي عاش ع السمع!!
مين في الحياة فاهم أو حتى كان مهتم
العقل صار واهم والقلب صابه الهم
قالوا الدنيا دي واقع أنا قولت كذب دي حلم
أرض وسما ومواقع وكإنه تتر الفيلم!!!
مفضوحة أفكاري بين الورق والقلم
وكإن أشعاري بتعري فيا الألم
عايش بنادي الأمل وبساطي أحلامي
وبعيني دمعة خجل بتداري أيامي !!
كل واحد فينا صورة تخفي أكتر م اللي ظاهر
والحقيقة الدنيا غولة تغري ديما ب المظاهر
كله عايش ب الجوارح والمشاعر فينا ماتت
كله خارج منها جارح والجراح كبرت وزادت!!
كله داخل في الكمين و الكمين دنيا المتع
واللي عايش مستقيم غصب عنه بينخدع
الحياة مشوار طويل وانت فيك أجمل حكاية
يوم ماتعرف إنت مين تبقى دي أعظم نهاية!؟
شعر
عامي
للبلياتشو
وليد حسانين @
14/12/2019
السبت . القاهرة
وليد عوض إبراهيم حسانين@
