زجلية بعنوان :
مالْ لْميزان***
مال لميزان
شاخ ؤ عاد غِ تيْخرًف
ساير مفضوح عريان
لْحال عاد ليل بْهيم يْخَوًف
عقلية لْقطيع لَخْواض وصْنان
ؤبين نْجوم الدنيا راه ما يْشرًف
تمييز وميز وحرمان
مال لميزان يا فلان
شي مكسي ؤشي عريان
ها الظلم ها الطغيان
حجايَة عفا الله عما سلف...
وضْعيف يدفع ثَمان
ذاك لي جهلوه ؤفي النقص رماوه
ماشي لخطروا هما لي بْلاوه
ضيعوه في النضج والصحة ولأَمان
شي وْجوه ركبوا عليه ملاطي
بغاو يورثو زعامة والله هو لعاطي
حشوا بمناجلهم ورد سْهول وَنُعمان
ظنوا نفوسهم تولدوا باش يبقاو قادة
يورثوا ولادهم ؤ حنا نصفقو يا سادة
لْمال وسُلطة غرًاتهم ؤباعوا لْإنسان
مال لميزان
لبسيط عاد محقور مادْ ليدين
زعما رحموه وهما لْدَمو ناهبين
تحراميات لْخُبث وجهالة ولغنان
مال الميزان
زادت لهوة والطبقية
ما كاين غير نتعلا عليك تْعَلا علي
لمال لعام ولمخلوق مزلوط جيعان
سدوا عليه كَاع لَبْواب
بغاو كلشي سعًاي وشطاب
ينظف خنزهم وينقي لمكان
ما بغاو يزاحمهم واعي
فرضوا لجهل ولخرافة بَتْلاوي
خوات الجعبة ؤبنادم في فقرو حيران
ما بقى يهمو آش تيطرا في لَعْلالي
قهروه ؤ ب لغلا داسوه ؤ بَلْعَلاًلي
سكت سكتة ؤرضا ب لِكاين وكان
عاد همو في بطنو
يضحك ليوم لغد يهجرو
عصابة الخطفة قلال لامان
مال الميزان
عاد لمعقول وصفا مذمة
نفاق ولكذوب زاد لحظ غمة
فنوض صون بلادك...
من دعاة زًلطة وَحِلف الشيطان
الشاعر والزجال: احمد الكندودي
