جزيرة امان
يا قلبي المهاجر في بحر العذاب
بيدور على مرسى يفتح له باب
ويداري جراحه من ريح الغياب
وبالحضن الدافي يرسّينا
عايز بيت حقيقي ملوش ميت وش
ولا فيه خديعة ولا فيه غش
وقلب بجماله في وشي يبش
وبالفرح الصادق يوافينا
يا تعب السنين في سكة ضباب
وقلوب باعتنا من غير اسباب
ووعود كانت كدب ووهم وسراب
والمر كان دايما يغذينا
بنده وصوتي في المدى مسموع
فين اللي حبه يطفي الشموع
ويمسح بيده دمع الرجوع
وبالوفا والاصل يهدينا
عايز اللي يفهم صمت الكلام
ويكون لي في الشدة درع وسلام
ونعدي سوا مر الايام
والحب بالخير يراضينا
رموشه قصيدة وعيونه نجاة
وشفايفه بتقطر سكر حياة
ونعيش في جنه ماليها الصفاء
والشوق في ليله يغنينا
انا شاعر البسطاء وقلبي كبير
عايش للناس وبحب الغير
ودايما بآمل في بكرة كتير
والعدل يسكن اراضينا
يا اه من وجع ساكن في العروق
فين اللي بكرة معاه البال يروق
وننسى المرار في اول دوق
وبالسعد دايما ينادينا
مش طالب مال ولا طالب جاه
انا طالب قلب اعيش في حماه
ويكون هو سندي واكون انا وياه
ورب الكون بالستر يغطينا
لو لقيته هكتب سطر جديد
واعيش حياتي في فجر سعيد
ولو ملقيتوش هفضل وحيد
واقول فين الحب يحيينا
كلمات وتأليف شاعرالبسطاء سعيدسعيدامام